182
La Polizia di Stato di Gurize e à arestât un citadin rumen di 36 agns responsabil, dopomisdì ai 8 di Novembar, di une robarie di alcolics intun supermarcjât di vie Terza Armata, recuperant intal stes timp plui di 200 butiliis probabilmentri robadis.
La ativitât, fate de Squadra volante de Cuesture, e jere scomençade dopo che une dipendente de buteghe e veve viodût l’om intant che al platave la marcjanzie, par dopo passâ lis cassis e lâ fûr cence paiâ. I agjents a àn scuviert che il lari, di 36 agns, al veve puartât vie ben 16 butiliis di alcolics, par un valôr di passe 170 euros, tornadis daurman al supermarcjât. (ADG) – 10.11.2021
