Di passe un an, al maltratave la mari che lu veve acetât in cjase a Triest inte prove di curâ la sô tossicodipendence. Ogni dì, però, il zovin, di 26 agns, al angariave la femine cun menacis, ofesis e agressions variis par otignî bêçs di jê. Par cheste reson il zovin al è stât arestât intai dîs passâts in esecuzion di une ordenance di custodie cautelâr in preson mandade fûr dal Gip, acetant une domande in chest sens de Pm Chiara De Grassi, titulâr dal procediment.
La femine si jere dreçade ai Carabinîrs al principi dal mês di Avost denunziant il compuartament dal fi, che al dave grant pinsîr. Dopo aciertaments e investigazions, i Carabinîrs a àn denunziât il zovin ae autoritât judiziarie. Il zovin al è duncje stât tirât fûr e sierât inte preson dal Coroneo. (a.d.g.) – 04.09.23
