I financîrs dal Comant provinciâl di Pordenon, adun cui agjents de Polizie locâl dal Friûl Ocidentâl, a àn arestât un citadin pakistan intant che al spaçave droghe a un dal so stes Paîs.
L’arest al è sucedût tal dopomisdì dai 25 di Otubar dilunc des operazions di control inte zone dal Nunciel fatis de Vuardie di finance dal grup di Pordenon e dal personâl dal repart radio mobile de Polizie locâl. Dongje dal puint di Adamo ed Eva, i agjents a vevin viodût doi forescj che si scambiavin robe e il control al à permetût di scuvierzi che si tratave di hashish.
Intant che cui che al comprave al vignive identificât, il spaçadôr al à cirût di scjampâ dant cuintri ai agjents, ma al è stât blocât e arestât cu la acuse di spaç e resistence a public uficiâl. Intor dal om a son stâts cjatâts 110 euros e 64 grams di hashish, plui i 3,3 de vendite e altris 2,9 butâts vie dilunc de fuide. (a.d.g.) – 30.10.2024
