I agjents de Polizie di Stât de Scuadre volant de Cuesture di Udin inte matinade di vinars ai 5 di Avost a àn arestât doi citadins pakistans par detenzion ilecite pai fins di spaç di cocaine.
Dilunc di un servizi di control inte zone dongje de stazion, i poliziots a àn viodût i moviments di une persone inte aree de ex fondarie Safau. Intun edifici i agjents a àn cjatât doi oms, citadins pakistans cence cjase; un di lôr al à cirût di platâ sot dal materàs un pachet cun dentri cinc pachets plui piçui di cocaine, par un pês di plui o mancul 30 grams. Chel di 27 agns al veve trê smartphone e 195 euros. Il conazionâl, 40 agns, al veve 350 euros, trê belancins di precision e materiâl pal confezionament des dosis di droghe destinadis al spaç. (A.D.G.) – 09.08.2022
