Il Cuarp forestâl regjonâl al à secuestrât 31 cjans di raze Labrador, tra chescj a jerin 21 pumars e 10 grancj, cjatâts intun arlevament abusîf a Atimis. I cjans, cierts tratâts mâl, a jerin tignûts in spazis no adats e metûts in vendite doprant Internet.
La operazion e je tacade daspò de segnalazion di un che al voleve comprâ un cjan. Une cubie e vendeve i animâi cence nissune autorizazion sanitarie e, cundut che e veve un zardin grant, no tignive ben i cjans: vot grancj doprâts par vê pumars a vivevin in scjaipulis cussì piçulis di no rivâ cuasi a movisi. Cun di plui, i piçui a vignivin puartâts vie ae mari masse adore e cence podê bevi aghe in libertât.
La cubie e je stade denunziade ae Procure de Republiche di Udin par maltratament di animâi. (a.d.g.) – 09.07.2024
