Cjapât un fraudadôr prime che al rivàs a scjampâ in France cuntune auto a pene comprade. E je la operazion fate de Vuardie di finance di Pordenon, che e à rivât a blocâ il delincuent che al veve comprât une auto eletriche Mercedes EQA 250 di un citadin di Pordenon, paiant cuntun assegn circolâr falât di 32.300 euros.
Il citadin, cuant che al jere lât in bancje il di’ dopo, al veve scuviert che l’assegn al jere falât e al à visât daurman i financîrs. I agjents a vevin scuviert che il fraudadôr al jere za cognossût par vê freât une vore di int e a àn domandât daurman ae Aci e al Pra di blocâ il trasferiment di proprietât, intant che a viodevin indulà che si cjatave l’automobil in graciis dal Gps, cjatât a Chivasso, pôc prime dal confin cu la France, indulà che e je stade cjatade e tornade indaûr al proprietari. Il fraudadôr al è stât denunziât. (a.d.g.) – 03.12.2024
