109
Une machine e je implombade cheste matine dentri di un parc di Feagne, par dopo sfracassâsi cuintri un veicul parcât. Il scuintri semi-frontâl al è sucedût aes 11.30 tal parc dal supermarcjât Eurospar e al à cjapât dôs Fiat Punto.
La Polizie locâl e indaghe su lis causis de jessude autonome, ma nol è escludût che un mâl al vedi cjapât la automobiliste che in chel moment e jere daûr a frontâ la rotatorie tra vie Udine e vie Spilimbergo, devant dal albierc Alle Crosere.
La vuidadore e je stade dopo socorude e traspuartade cuntune ambulance intal ospedâl di Udin. Sul puest a son intervignûts ancje i oms dal elisocors regjonâl e lis Vuardiis dal fûc. (a.d.g.) – 18.09.23
