Barcis fiscade di un burlaç fuart, slac dilunc de strade regjonâl 251

Un burlaç une vore fuart al à cjapât vie pe gnot, tor des 2, il Cjanâl da la Ciline e soredut Barcis, provocant un slac di pantan e pieris su la strade regjonâl 251, cence dut câs creâ pericui parcè che a chê ore nol jere nissun ator. La strade e je tornade a vierzi daurman in graciis dal intervent di Fvgstrade e de Protezion civîl.

“O vin patît dams un pôc in dut il paîs – al à dit il sindic di Barcis Claudio Traina – parcè che i 130 milimetris di aghe vignude ju’ in mancul di une ore a àn metût in crisi la rêt di canâi. Cetantis oparis fatis tai agns passâts, par cause dai cambiaments climatics, cun fenomens simpri plui fuarts, o ai pôre che a stedin deventant insuficientis”. (a.d.g.) – 26.08.2024