Al è stât fat îr di sere il lavôr di disinfestazion a Muçane, tra lis 10 e lis 10.30, in vie Roma e in vie San Giorgio, indulà che intai dîs passâts doi anzians, un om e une femine, si jerin malâts cul virus dal West Nile. I doi malâts si cjatin intal ospedâl di Tisane e lis lôr cundizions no dan pinsîr.
“No vin vût problemis – e à dit il sindic Genziana Buffon – par fâ il tratament che al permet di copâ i mussats grancj. Vuê di buinore al è tacât il lavôr par copâ lis larvis in ducj i tombins, tai scarics des gornis e intai poçs in dut il teritori dal nestri Comun”.
Il sindic al torne ancje a domandâ ai citadins di tirâ vie i vâs, robis e jerbatis tai lôr zardins, visant che il Comun al cirarà di comprâ il velen par copâ lis larvis che al metarà a disposizion de int. (a.d.g.) – 08.08.2024
