Nol tire un bon aiar a Udin intai ultins timps. Desenis di biliets cun messaçs raziscj e invîts ae violence a son stâts cjatâts tra lis machinis parcadis dilunc viâl Vat, dongje dal Parc Brun di plaçâl Cjavriis. A jerin scritis peraulis cuintri dai forescj e plenis di odi come “vueli di ricin e baston par ducj i extracomunitaris” e altris che a invidavin ae rivolte.
La cjatade e je stade fate vuê di matine in graciis de segnalazion di une persone che e passave di chês bandis, che al à clamât daurman i carabinîrs.
I biliets scrits a man cuntun penarel neri a somein opare di un sôl. Almancul une dozene chei cjatâts e secuestrâts, ma si pense che a ‘ndi fossin une vore di plui, parcè che tancj che a passavin ju àn tirâts su’ e butâts te scovacere.
La discuvierte e à fat rabiâ i residents dal cuartîr, innomenât pe sô vivarose aree verde, frecuentade di grancj e piçui di tantis nazionalitâts.
Sul puest a son rivâts ancje i agjents de Polizie locâl par un sorelûc. Cumò si cîr cui che al à scrit chei sfueis. (a.d.g.) – 11.07.2024
