Un om di 54 agns di Udin al è stât blocât de Polizie locâl de Comunitât de Cjargne par detenzion di droghe cul fin di spaç.
La percuisizion domiciliâr fate cul jutori di une unitât antidroghe cul cjan dai coleghis di Udin, dilunc di une indagjin sul spaç di droghe inviade intun comun cjargnel, al à permetût ai agjents di cjatâ plui di 850 grams di mariuane secjade e dividude in cetancj vâs di veri, cun tant di etichete par tipologjie. Par di plui, al è ancje stât cjatât un et e mieç di polvar fat cu lis rosis de mariuane, dentri di un frigorifar.
Intal garage il cjan antidroghe “Galant” al à invezit nasât un pocje di hashish. La droghe vendude e varès fat vuadagnâ plui di 9 mil euros. I agjents a àn ancje secuestrât struments pe coltivazion e plui di 4 chilos di nitrât di calci, doprât come fertilizant, adun cun cetancj belancins di precision. (a.d.g.) – 04.06.2024
