Finâl positîf pal om baricât in cjase a Cordovât

E je finide pôcs minûts dopo misdì di vuê la vicende dal ex inzegnîr sierât in cjase di doi dîs a Cordovât: l’om di 55 agns al à consegnât infin lis armis; origjinari di S. Donà de Plâf, di îr al veve acetât di fevelâ cuntun mediatôr, dopo che intes primis oris si jere rimetût dome a videos sul so canâl YouTube par comunicâ. Particolâr, chest, che al à viert une sfese: dopo une tratative durade par dute la matinade, l’om al à consegnât lis armis ai Carabinîrs che a son jentrâts inte cjase sô.

In chestis 48 oris, 300 lis personis restadis blocadis intes lôr cjasis, 13 chês che a son stadis fatis lâ fûr de palacine teatri de vicende e sîs lis buteghis intai contors restadis sieradis. (a.d.g.) – 01.09.23