Un boscadôr al è restât ferît cheste matine intant che al seave une plante intai boscs inte frazion Ross di Vît. A clamâ il Nue112 une persone che e lavorave cun lui.
L’incident al è sucedût par vie che la plante a pene taiade e je colade suntun altri arbul crevant la part parsore che e à cjapât sot l’om colant suntune gjambe. Sul puest, inviâts de Sores, i tecnics de stazion di Manià dal Socors Alpin, i pompîrs e la ambulance. L’ecuipaç dal elisocors al è stât disbarcjât sul puest cu la binte par stabilizâ e meti in bareglot il ferît cul jutori des scuadris di tiere rivadis sul puest. Daspò il ferît al è stât traspuartât par une desene di metris dilunc di une scarpade, sigurant il bareglot cu lis cuardis, fin a rivâ li de strade, dulà che il recupar cu la binte al è stât plui facil. L’om al è stât traspuartât cul elicotar al ospedâl di Pordenon. (ADG) – 23.11.2022
