Al è in cundizions grivis il fantat di 16 agns di Osôf che, îr di sere tor des 11.30, intant che al jere ae vuide de sô moto si è dât dentri cuntune machine a Glemone.
Al somee che la machine che e stave lant dilunc vie Zorutti e vedi cirût di svoltâ bande vie Maitani, cuant che e je rivade la moto cul zovin e un altri passizîr. Daspò dal bot, il vuidadôr de moto al è svolât par une desene di metris e ancje l’amì che al jere sentât daûr al è lât ju’ sul asfalt.
E je rivade daurman une ambulance e ancje l’elicotar: une volte stabilizât dai infermîrs, il zovin al è stât puartât cul elicotar intal ospedâl di Udin. La sô prognosi e je risiervade. Mancul grivis lis feridis dal amì di 17 agns, puartât ancje lui tal ospedâl cu la ambulance, intant che il vuidadôr de auto no si è fat nuie.
Sul puest, di là dai pompîrs e dal personâl dal 118, ancje i carabinîrs di Paulâr. (a.d.g.) – 15.07.2024
