A son plui di 35 mil i prodots eletrics e eletronics, marcâts in maniere no dovude cun bol CE, secuestrâts dal Comant provinciâl de Vuardie di Finance di Udin dilunc di un control dongje la bariere autostradâl A23 di Ugovize, in jentrade intal teritori nazionâl.
In particolâr, i financîrs de Compagnie di Tumieç, dopo de ativitât continue di verifiche viers dai traspuartadôrs di marcjanzie che e ven di Paîs UE e extra-UE, a àn fat une serie di controi smirâts viers dai sogjets plui a risi, in relazion ae importazion pussibile di prodots no sigûrs e nocîfs in potence pe salût.
Lis Flamis zalis a àn individuât cussì un autoarticolât cun targhe slovene, che al rivave de Gjermanie e al traspuartave 35.328 articui eletrics e eletronics (panei solârs, lampadis, strichis led, power bank, fuarpiis eletrichis, decodificadôr par smart TV), che a ripuartin la marcadure “CE” aplicade in maniere no dovude, stant che no je acompagnade de documentazion di conformitât aes normis in vore.
La marcjanzie e jere dute destinade ae vendite intune buteghe di Napoli, gjestide di un om di nazionalitât cinese, denunziât ae autoritât judiziarie di Udin. Se vendûts, i articui eletrics e eletronics iregolârs a varessin gjenerât rigjâfs par plui di 200 mil euros. (A.D.G.) – 20.01.2023
