Une zornade di mobilitazion a difese de sanitât publiche si è fate vuê in Friûl-Vignesie Julie par iniziative de Cgil che e à organizât variis iniziativis sul teritori e un presidi a Triest, devant dal palaç dal Consei regjonâl.
In particolâr al è stât domandât ae gnove Zonte Regjonâl “un cambi di marcje” su la sanitât publiche, che – stant ae Cgil – e je “la armadure” dal sisteme, cence “demonizâ il privât”.
Un miâr, secont il segretari gjenerâl de Cgil F-vj, Villiam Pezzetta, i manifestants a Triest. “Altris 400 invezit si son dâts dongje a Pordenon”, intant che “a Udin devant dai ospedâi al è stât fat volantinaç”.
Pezzetta al à sotlineât la “dibisugne di une programazion, che – al à dit – vuê no viodìn; lis lungjis listis di spiete; la carence e la tension dal personâl”.
Di 20 agns in ca, al à zontât, “al è stât un declin de sanitât publiche”. Cumò, par esempli, “nol bisugne straçâ la grande ocasion des risorsis dal Pnrr cu lis comunitâts de salût, che dal sigûr a àn di jessi no dome oparis murariis, ma a van jempladis cun personâl public par deventâ poliambulatoris funzionâi intal teritori. O domandìn une taule – al à concludût – par frontâ chescj temis”. (A.D.G.) – 10.03.2023
