A si cjate in cundizions grâfs un om di plui o mancul 60 agns che, intal dopomisdì sul tart di îr, pôc dopo lis 6.30, al è restât cjapât intun incident dilunc de regjonâl che coleghe Buri a Manzan, in prossimitât de taronde dal supermarcjât Aldi.
Al jere daûr a pedalâ in siele ae sô biciclete cuant che si è dât cuintri cuntun auto, par causis in cors di aciertament de bande dai Carabinieri di Manzan e dal Nucleo Radiomobile de Compagnia di Palme.
Dopo la clamade di aiût al Nue112, i infermîrs de centrâl a àn inviât sul puest l’ecuipaç di une ambulance di Cormons e l’elisocors. L’om al è stât traspuartât al ospedâl Santa Maria della Misericordia di Udin cu la ambulance. Intal impat, di fat, al à ripuartât lesions grâfs, in particolâr un traume cranic. (ADG) – 14.11.2022
