Doi presonîrs a àn assaltât tal zîr di 24 oris cinc agjents de Polizie penitenziarie. I fats, sucedûts tra lunis e martars, a son stâts denunziâts dal delegât dal Sappe (Sindacato autonomo polizia penitenziaria) Massimo Russo, che al à tornât a visâ de brute situazion de preson di vie Spalato, cun pôc personâl e plene di presonîrs plui di ce che e podarès tignî dentri la struture.
Tal prin episodi, un presonîr afghan cun problemis di droghe al à mangjât par proteste des batariis dopo che i vevin dineât ciertis medisinis.
Cuant che lu stavin puartant tal ospedâl, l’afghan al è saltât intor dai agjents tant che un di lôr al è stât cjapât pal cuel.
Il dì dopo altris trê agjents, che a vevin di puartâ un nordafrican tal ospedâl par fâ une visite li dal psichiatri, a àn vût a ce fâ cun lui che al stave fiscant dut e, cuant che al è stât dineât il so trasferiment, al à dât cuintri une altre volte a doi agjents. Ducj i cinc i poliziots a àn une prognosi dai 5 ai 12 dîs. (a.d.g.) – 27.02.2025
