In graciis di une investigazion fiscâl une vore dificile fate dal Nucli di polizie economiche e finanziarie de Vuardie di finance di Udin, une aziende che e lavorave tai traspuarts e di proprietât di une multinazionâl olandese e à scugnût tirâ fûr cinc milions di euros che a son lâts al Stât.
I agjents a vevin discuvierte dute une schirie di iregolaritâts controlant dute la documentazion e ancje la pueste eletroniche de aziende furlane, che no paiave la Iva disint che e furnive servizis ae aziende olandese che però e jere ancje la parone.
Ae fin i aministradôrs de aziende taliane a son stâts denunziâts ae Procure di Udin e dopo che la Agjenzie des Jentradis e à confermât i risultâts des investigazions la societât di chenti e à decidût di paiâ. (a.d.g.) – 13.11.2024
