Vuê di buinore i carabinîrs a àn blocât siet personis intes provinciis di Milan, Foggia e Barletta-Andria-Trani, acusadis di vê robât 1.500 cuessis di persut inte “Vecje Salumerie” di Rivignan-Teôr, vie pe gnot tra il prin e il doi di Avrîl dal 2023, fasint un botin di passe 200 mil euros.
Lis operazions, coordenadis dai carabinîrs di Tisane, cul jutori des Compagniis di Abbiategrasso, Cerignola e Andria, a son stadis fatis daspò de ordenance di custodie cautelâr dal Gip di Udin. La investigazion tacade daurman daspò de robarie sot de direzion de Procure di Udin, e je rivade a scuvierzi cemût che a àn lavorât i laris, in graciis ancje dai sorelûc e de analisi dai video di vigjilance, cui che a jerin i siet suspietâts e i trê camions doprâts par puartâ vie la robe. (a.d.g.) – 27.05.2024
