Al è stât blocât dai carabinîrs dal Nucli operatîf di Sacîl il responsabil presumût des dôs rapinis fatis inte sale slot Las Vegas di Spilimberc ai 20 di Mai e daspò ai 25 di Jugn inte sale slot Royal Prestige di Lavorêt.
Il mût di fâ dal autôr des dôs rapinis al è pardabon simil. Al jentrave in azion cu la muse cuvierte cuant che la sale e stave par sierâ daspò che i ultins clients a jerin lâts vie; al blocave dentri dai servizis i assegnâts des dôs ativitâts par dopo lâ bande de casse e puartâ vie ducj i bêçs in contants.
La investigazion clamade “cash cash”, fate dai carabinîrs di Sacîl, coordenâts de Procure di Pordenon, e je rivade a individuâ il delincuent, un citadin talian-american di 46 agns che al zuiave dispès intes salis slot ma che daspò des rapinis no si jere plui fat viodi.
Cuant che ai 18 di Setembar l’om al stave par partî di Vignesie cuntun avion ae volte di New York, i carabinîrs e la Polizie che a lavorin tal aeropuart di Tessera a son jentrâts in azion e a àn blocât l’om intant che si cjatave dentri dal autobus che lu stave puartant li dal avion. Il rapinadôr cumò si cjate inte preson di Vignesie. (a.d.g.) – 20.09.2024
