Al è stât identificât intal zîr di pocjis oris l’autôr de scorsade vandaliche fate la gnot passade ai dams di un locâl dal centri di Udin e di une cuarantine di veturis parcadis in rimessis condominiâls.
Numerôs i elements di prove tirâts sù de Polizie di Stât che a inclaudaressin il presumût autôr dai crevons. Al somee che al sedi un citadin talian maiôr di etât, resident inte prime perifarie Nord de citât.
Trê lis zonis cjapadis di smire dal om, ae ricercje probabile di bêçs o preziôs: vie Carducci, vie Marco Volpe e viâl Duodo. In cheste ultime strade, par esempli, il vandal al è jentrât inte rimesse soteranie di une palacine fasint a tocs lis barconetis di ben cinc veicui. No content dal so botin, l’om si è diret dopo viers il centri storic, dulà che al à tentât une altre incursion ai dams dal Bar Torriani.
Par ducj chescj reâts, l’om al sarà denunziât par robarie ingriviade di violence su lis robis, dam ingriviât e possès ilegjitim di struments di efrazion. (a.d.g.) – 10.10.23
