Ae fin di une lungje investigazion, i Carabinîrs de Stazion di Martignà a àn individuât, in chescj dîs, i presumûts autôrs di doi imbrois relatîfs ae vendite di pellet sucedûts intai ultins mês dal 2022.
I doi subiets identificâts, traviers la publicazion in rêt di un anunzi di vendite di pellet di cualitât a presits avantazôs, in dôs distintis ocasions a jerin rivâts a imbroiâ dôs personis, un resident in provincie e un intes Marcjis, che si jerin presentadis cuntun mieç di traspuart intun lûc vicin a Udin, a vevin paiât in contants ai presumûts vendidôrs une sume considerevule di bêçs (plui o mancul 10.000 euros) par dopo spietâ dibant la consegne dal materiâl dai doi trufadôrs che, intant, si jerin slontanâts cu la scuse di lâ intun dipuesit dongje par cjapâ la marcjanzie. Dopo une spiete lungje e dibant, i doi acuirents si jerin rindûts cont di jessi stâts fraudâts e si jerin dreçâts ai Carabinîrs che, dopo luncs aciertaments, a son rivâts a dâ un non ai doi trufadôrs (di 26 e 21 agns) e a denunziâju in stât di libertât ae autoritât judiziarie. (A.D.G.) – 26.04.2023
