Cjatât cence vite il turist todesc di 61 agns dispierdût îr intal mâr di Grau dulà che al jere daûr a nadâ. L’om al podarès vê vût un mancjament.
Lis ativitâts di ricercje scomençadis îr di matine pôc prime di misdì, coordenadis de Sale Operative de Cjapitanarie di Puart di Triest, no si son fermadis mai e cheste matine, tor lis 9 e mieze, il batel svelt GC B 44 dal Comant Vuardie Costiere di Grau al à cjatât il cuarp dal om.
Lis ativitâts di ricercje puartadis indevant in principi dilunc il litorâl di Grau, sedi in mâr che sul lît, si jerin slargjadis ancje al mâr viert, cence trascurâ purpûr lis aghis internis e il canâl di acès al Puart, patuliadis plui e plui voltis; e propit intal canâl di acès in puart, zone controlade ancje cheste matine dai mieçs de Vuardie Costiere, al è stât cjatât e recuperât il cuarp dal turist sfortunât. (A.D.G.) – 06.07.2023
