Cjoc al agredìs i carabinîrs a S. Pieri dai Sclavons

I carabinîrs di Cividât a àn arestât îr di gnot un om di 29 agns, resident a Çurçuvint, par ofese a uficiâl public.

I militârs a son intervignûts a S. Pieri dai Sclavons, in localitât Clenie, parcè che e jere stade segnalade une barufe tra doi oms; a pene rivade sul puest la patulie, l’om al è lât in escandessencis e, salacor par colpe dal smodât consum di alcolics, al à cirût di colpî i carabinîrs cun pidadis e muardudis. Ai carabinîrs nol è restât altri di fâ che imobilizâlu e arestâlu. (a.d.g.) – 02.10.23