Il judiç Giulia Pussini dal Tribunâl di Udin e à condanât un om di 27 agns e une femine di 30 agns, ducj i doi residents a Udin, a trê agns e vot mês di reclusion par ognidun. La cubie e jere acusade di jessi jentrade in dôs cjasis abitadis di vecjos, dulà che a vevin robât une borse e 1.100 euros in contants. A jerin acusâts ancje di altris dôs robariis in abitazion e dal ûs di cjartis di credit, acusis che par chês a son invezit stâts assolts.
Lis robariis a rimontin al Otubar dal 2018. Daûr de acuse, i doi a jerin jentrâts inte abitazion di une anziane di Magnan in Riviere, muarte a 94 agns prime de sentence, dulà che a vevin cjatât i bêçs contants tignûts intun scansel de cusine.
Cinc dîs dopo, la femine e jere jentrade inte cjase di une cubie anziane di Cividât che e viveve cu la fie. Afermant di jessi une cognossinte dal om, costret te carocele e à straviât lis dôs feminis, intant che il compliç al cjapave sù la borse. Il judiç al à condanât i doi a paiâ ae famee di Cividât 2 mil euros pai dams patîts.
“La condane – a disin i difensôrs, i avocats Massimiliano Aita e Emanuela Azzalini – si base su ricognossiments fotografics fats di anzians e cence contraditori”. Sigûr il ricors in apel. (A.D.G.) – 09.02.2023
