Bande des pacaris condanade a 24 agns e 10 mês di reclusion. La sentence e je stade mandade fûr cheste matine dal Tribunâl di Pordenon in composizion colegjâl.
Il trê imputâts, Maricel Borsan, Marius Sociu, e Iulian Gicu Dobre, ducj i trê rumens e di etât tra i 26 e i 27 agns, in preson dal 2021, a son stâts ritignûts responsabii di une serie di robariis e di une rapine fatis in trê moments diviers tra Savogne dal Lusinç, S. Michêl al Tiliment, Lavorêt, Purcie, Pordenon, Gardiscje e S. Vît dal Tiliment, Darbe e Martignà. A Spilimberc, dopo vê cometût une robarie al Città Fiera di Martignà, butant a tiere doi estintôrs a jerin rivâts a blocâ une machine dai carabinîrs che ur coreve daûr.
Tra i 25 e i 26 di Març l’arest de bande, cuntun cuart component, Stanica Broasca, che par scjampâ ai militârs de Arme al jere muart inneât intal flum Lusinç.
Vuê e je rivade la sentence di condane, ma no je finide. Cuintri dai trê rumens al è un procediment separât, che al è stât za domandât il rimant a judizi, dal moment che la Procure di Pordenon e riten che i stes a sedin responsabii di altris 20 tra robariis e rapinis cun tant di 120 cjâfs di imputazion. (A.D.G.) – 24.03.2023
