A son stâts condanâts cul rituâl scurtât dal judiç des udiencis preliminârs Mariarosa Persico i doi laris che a vevin robât in doi locâi a Udin tal Mai di chest an. Sebastiano Santoro, di 36 agns di Udin, e Saifeddine Moussa, citadin tunisin di 21 agns, a son stâts condanâts tal ordin a un an e 8 mês e a un an e doi mês di preson. Il pm al veve domandât trê agns par om.
Lis robariis a jerin stadis fatis in plui o mancul 24 oris ai 24 e ai 26 di Mai in doi locâi a Udin sud, indulà che a vevin puartât vie ancje i bêçs lassâts ai camarîrs. Il prin locâl cjapât di smire al jere stât la Osteria Ai Tre Musoni di vie Marsala, indulà che a jerin jentrâts fiscant un veri e puartant vie telefonins, i bêçs dai camarîrs e 300 euros de casse.
La gnot dopo e jere stade la volte dal Caffè Beltrame in vie dal Partidor dopo vê fiscât un barcon, indulà che a jerin stâts puartâts vie in dut 1.350 euros. E propit in chê gnot i doi delincuents a jerin stâts fermâts dai carabinîrs di Pasian di Prât par un control e intun russac dai doi e jere saltade fûr la robe cjapade su’ dilunc des robariis. (a.d.g.) – 12.11.2024
