La sô incursion vie pe gnot inte ostarie in centri a S. Denêl e jere stade filmade des telecjamaris de bancje daprûf: vuê al è stât condanât a doi agns e vot mês di reclusion cul rituâl scurtât. Cristian Pezzetta, 51 agns di Ruvigne, al è stât ricognossût colpevul in prin grât di robarie in abitazion dal judiç Daniele Faleschini Barnaba dal Tribunâl di Udin.
La vicende e rimonte ae gnot tra i 6 e i 7 di Avrîl dal an passât. Daûr de acuse, Pezzetta al jere jentrât intal locâl di vie Garibaldi. No si jere contentât dai 200 euros gjavâts de casse. Di là dal contant, al veve puartât vie une biciclete eletriche e altris ogjets.
“La cuerele e je stade ritirade – al sclarìs il difensôr, l’avocat Filippo Capomacchia – e il reât al larès ricualificât in robarie ingriviade parcè che al è stât fat intun esercizi public e no intune abitazion. O fasarìn apel – al conclût – par otignî il no lûc a procedi”. (A.D.G.) – 18.04.2023
