Il Nucli Ispetorât Carabinîrs dal Lavôr di Udin, cu la colaborazion dai militârs des Compagniis di Udin e Palme dilunc de setemane, al à fat controi intal setôr dai esercizis publics, agriculture e servizis ae persone par controlâ la ocupazion regolâr dai lavoradôrs e il rispiet des normis in materie di sigurece, salût e igjiene sui lûcs di lavôr.
I controi fats su dut il teritori provinciâl a àn permetût di scuvierzi violazions in materie di sigurece tant che la mancjade redazion dal DVR, la mancjade formazion dai lavoradôrs, la mancjance de visite mediche ai lavoradôrs che a àn di jessi sot control sanitari, la presince di lavoranzie in neri. A son stâts controlâts un esercizi public, dôs aziendis agriculis e un centri massaçs. A son stâts 31 i lavoradôrs individuâts e a son stadis sospindudis lis ativitâts di un centri massaçs par violazions gravis su la sigurece e di un esercizi public par lavôr neri. In complès a son stadis fatis sanzions par plui o mancul 80 mil euros.
Sanzions par 35 mil euros plui o mancul a une aziende agricule a Codroip, dulà che e jere presinte une aziende che e faseve ativitât di supuart ae agriculture. La aziende e je stade sanzionade par no vê fat fâ la visite mediche ai lavoradôrs e pe presince di un lavoradôr in neri.
Sanzions par plui o mancul 5 mil euros a une aziende agricule di Cuar di Rosacis, che e opere a S. Zuan dal Nadison in ativitât di supuart ae agriculture, che intai siei confronts a son stadis rilevadis violazions su la sigurece in materie di formazion dai lavoradôrs.
Sanzions par plui di 16 mil euros a un centri massaçs a Udin che al so interni a son stadis cjatadis violazions in materie di redazion dal DVR, e mancjade formazion su la sigurece ai lavoradôrs. E’ stade disponude ancje la sospension de ativitât imprenditoriâl par violazions gravis in materie di sigurece.
Sanzions par plui di 20 mil euros intun ristorant a Pradaman, che al so interni a son stadis cjatadis violazions in materie di lavôr neri (5 lavoradôrs in neri su 5 impleâts). E’ je stade disponude la sospension de ativitât imprenditoriâl. (A.D.G.) – 23.01.2023
