Controi plui sevêrs in Borc Stazion a Udin

Degrât e compuartaments malcreançôs. Masse gnots agjitadis inte zone di Borc Stazion. Il Comun di Udin al comuniche un cambi di marcje inte sigurece, cun controi plui rigorôs e sanzions plui pesantis. E al anticipe dôs ordenancis: vonde ae vendite di bevandis alcolichis fredis intes buteghis de zone e sierade anticipade dai locâi, aes 11 di sere, tra domenie e joibe, e a miezegnot vinars e sabide, intant che i minimarket a àn di sierâ simpri aes 9 di sere.

A son stâts il sindic Pietro Fontanini e l’assessôr ae sigurece Alessandro Ciani a ilustrâ lis novitâts intune conference stampe che si è tignude cheste matine a Palaç D’Aronco. (A.D.G.) – 1.07.2022