Il Comitât pal ordin e la sigurece, convocât vuê di matine te Prefeture di Udin, daspò dal scurtissament sucedût vie pe gnot di domenie fûr di une discoteche di Tavagnà, al à decidût che a saran controladis dutis lis struturis che a dan acet ai minôrs forescj no compagnâts.
Tra lis personis cjapadis dentri, di fat, al jere ancje un zovin albanês cun mancul di 18 agns, che al è stât ferît inte schene e aes mans, suspietât di vê tirât dôs scurtissadis tal toraç dal zovin di 26 agns cumò ricoverât in cundizions grivis tal ospedâl di Udin. Il curtìs di 15 centimetris doprât dal agressôr al è stât cjatât fûr de discoteche.
Dai controi al è saltât fûr che l’albanês al jere ospitât inte struture pai minôrs no compagnâts de cooperative Hanna House, in plaçâl Cella a Udin, che e lavore par cont dal Comun di Milan.
Il Tribunâl dal cjâf lûc lombart al veve di fat afidât il zovin in misure cautelâr ae cooperative furlane. Dopo la misure e jere stade sospindude e il zovin metût ae prove. Cence nissune misure restritive l’albanês al è jessût sabide de comunitât cence però tornâ dentri prime des dîs di sere e i responsabii de cooperative a vevin visat daurman lis fuarcis dal ordin. (a.d.g.) – 24.02.2025
