Il Gip dal Tribunâl di Udin al à validât l’arest, cun custodie cautelâr in preson, pai trê zovins che vie pe gnot dai 21 di Jugn a son stâts protagoniscj de barufe indulà che il citadin gjaponês Shimpei Tominaga, che al vîf a Udin di cetancj agns e al veve cirût di difindi un altri zovin che al sanganave, al è stât cjapât in plene muse di un pugn e colant a tiere al è restât ferît in maniere grivie.
La acuse – che par cumò e je di lesions – e je cuintri Samuele Battistella, 20 agns, resident a Mareno di Piave (Trevîs), che al varès tirât il pugn. Cun lui a jerin Daniele Wedam, 20 agns, e Abdallah Djouamaa, 22 agns, ducj i doi di Conean (Trevîs). Il judiç al à ancje decidût par un dai doi ucrains cjapâts dentri inte barufe la improibizion di vivi in Friûl-Vignesie Julie.
Intant e je rivade dal Gjapon la famee dal imprenditôr che cumò al è ricoverât intal ospedâl di Udin, che par lui e je stade inviade la comission che e varà di verificâ la muart cerebrâl. Se chest al ves di sucedi, par cui che al à tirât il pugn, la acuse e deventarès daurman di omicidi preterintenzionâl. (a.d.g.) – 25.06.2024
