Corot a Tarvis pe pierdite di William Blanzan, l’om di 59 agns muart îr dopomisdì a Pontêbe dopo che il camion che al vuidave si è ribaltât e al à cjapât fûc.
L’incident al è sucedût dilunc dal viadot su la strade statâl 13. L’om al jere une vore cognossût a Tarvis, e tal passât al veve lavorât ancje come cjâf scuadre tai pompîrs volontaris di Cjamparòs.
Il camionist che al lavorave pe aziende Albano Nicolò di Tarvis, par causis di scuvierzi de bande dai carabinîrs, cul so mieç al è lât su chê altre corsie fin cuant che nol è lât a sbati cuintri dal guardrail, tant che no si pues escludi che al vedi vût un mâl improvîs. Dopo il bot fuart cuintri dal guardrail, il camion si è ribaltât e al à cjapât fûc, cul puar om muart tal mieç des flamis. Il camion al è stât metût sot secuestri. (a.d.g.) – 24.09.2024
