Dopo dai disordins sucedûts vie pe gnot tra sabide ai 29 e domenie ai 30 di Març dentri dal Cpr di Gardiscje il sindicât Unarma Fvg al à mandât aes istituzions une schirie di domandis par cirî di meti a puest la situazion: “Al covente di sierâ lis struturis par fâ la lôr ricualificazion, di ridusi il numar di chei che a son dentri, di fâ deventâ i rimpatris plui svelts”. Chê di sabide vie pe gnot e je stade une rivolte inviade di plui o mancul vincj oms cuintri dai agjents, impiant fûcs, tirant porcarie intor di lôr e adiriture provocant feridis a un financîr che al veve cirût di tirâ vie une arme a une dai scalmanâts.
“Lis istituzions – e à scrit Unarma Fvg – a àn di rindisi cont che no si pues plui dome fâ afidament su lis cualitâts e lis capacitâts dai singui. A coventin intervents a nivel centrâl che a tuteledin di plui la sigurece dai agjents. Al sarès ancje ben pensâ di doprâ personâl che al rivi dai reparts specializâts te gjestion dal ordin public, plui usâts a frontâ situazions critichis come chê sucedude a Gardiscje”. (a.d.g.) – 31.03.2025
