Cuatri docents di Informatiche de Universitât dal Friûl tra i plui impuartants pe inteligjence artificiâl

A son ancje cuatri docents di Informatiche de Universitât dal Friûl fra i 2000 studiôs plui influents tal mont in diviers cjamps de inteligjence artificiâl. Al è cetant che al ven fûr de classifiche “AI 2000” (https://www.aminer.cn/ai2000) fate de Associazion cinese di inteligjence artificiâl e de Tsinghua University pal an 2023. I nons a son chei di Fabio Buttussi, Luca Chittaro, Angelo Montanari e Giuseppe Serra, ducj dal Dipartiment di Siencis matematichis, informatichis e fisichis. I creadôrs de graduatorie a àn identificât une ventine di areis dissiplinârs, analizant i indicadôrs bibliometrics dai studiôs di inteligjence artificiâl dal mont che a àn publicât e presentât contribûts sientifics intai ultins 10 agns intes rivistis principâls e in cunvignis internazionâls. Par creâ la classifiche anuâl a vegnin esaminadis plui o mancul 180 mil publicazions sientifichis di passe 200 mil studiôs di inteligjence artificiâl intal mont. (A.I.) – 06.03.2023