Cuatri passeur, tra i 36 e i 50 agns di etât, a son stâts arestâts de Polizie di Stât di Triest intes ultimis setemanis pal reât di favoriment de imigrazion clandestine dilunc de rote balcaniche. A son stâts fermâts in dîs diviers intant che a traspuartavin in maniere ilegâl in Italie une trentine di migrants iregolârs.
In preson a son finîts cussì doi citadins ucrains, cjatâts ae vuide di dôs auto cun dentri 10 migrants iregolârs, cun cualchidun di lôr scuindût intal baûl. In preson ancje un citadin serp, component di une stafete che e je rivade a puartâ in Italie almancul 6 fruts e 10 adults.
Arestât dai agjents dal Setôr Polizie di Frontiere di Triest ancje un cravuat a S. Dorligo de Val, intant che al provave a passâ il confin cuntun minôr di 14 agns e doi adults. (A.D.G.) – 04.07.2023
