Lis gnovis impresis che si interessin di tecnologjie dispès a son creadis di zovins che, dopo vê finît i studis, a decidin di trasformâ lis lôr competencis intun percors professionâl autonom, ma l’entusiasim e lis competencis no bastin. Confindustria Udine e Friuli Innovazione, cul jutori de Regjon Friûl-Vignesie Julie, a àn decidût di meti il lôr savê al servizi di chestis gnovis impresis, cul obietîf di trasferî chês basis di planificazion, gjestion e promozion indispensabilis pal sucès des startup e judâlis a ridusi i pericui e i piçui erôrs tipics dai talents zovins.
Al nas cussì “Startup Academy”, progjet che al cjape forme su lis esigjencis pandudes de Comission Inovazion di Confindustria Udine e al acompagne lis startup fint dai primis moments de lôr vite, cuntune serie di 4 modui formatîfs, di 16 oris ognidun.
“Su la base de nestre esperience – e à visât Anna Mareschi Danieli, vicepresident di Confindustria Udine – vê une idee otime e jessi brâfs dal pont di viste tecnologjic nol baste par creâ une aziende di sucès. Ai invistidôrs al covente un progjet indulà che al sedi sclarît in mût trasparent cui che al fâs il prodot, cemût che si lu vent, cuâle che e je la sô sostignibilitât economiche e finanziarie. A front di ideis brilantis e ben o presentais, al tocje però a nô imprenditôrs vê il cûr di invistî intai zovins, finanziant lis lôr ativitât”.
Dino Feragotto, vicepresident di Confindustria Udine cun deleghe ae Inovazion, al à volût ribati l’impegn di Confindustria: “L’element che plui o tin a sotlineâ al è che “Startup Academy” al è un progjet di sisteme che al cjape dute la regjon e al rapresente la prosecuzion dal progjet Startup di Confindustrie Udin, che fin cumò al à cjapât plui di 70 impresis dal 2018 a vuê”.
“Startup Academy si met dal dut intal cuadri des iniziativis inviadis de Regjon par favorî la nassite di gnovis impresis e puarta talents sul nestri teritori – e à declarât l’assessôr regjonâl al Lavôr Alessia Rosolen -. O soi duncje contente par a cheste iniziative che e devente l’inizi di un percors che su chel la Aministrazion e à invistît za e a larà indevant a falu”. (ADG) – 12.12.2022
