Dams pal brut timp intal Friûl Ocidentâl

A dute gnot une perturbazion violente e à colpît il Friûl Ocidentâl, massime i comuns di Fontanefrede, Lavorêt e Sant Quarin. Lis domandis di intervent rivadis ai Vigjii dal fûc a àn rivuardât soredut arbui tirâts jù e cuvierts distaponâts. Dams ancje aes culturis agriculis, za in dificoltât par vie dal sec des ultimis setemanis. Par tignî front ae situazion a son daûr a operâ scuadris dai pompîrs di dute la ex provincie. Al moment a son stâts fats plui o mancul 20 intervents, intant che plui di 80 a son in spiete e a son daûr a vignî sù tantis gnovis situazions di criticitât. In gjenerâl, però, la ploie fuarte no je colade inte zone dulà che ancjemò a son daûr a verificâ i fûcs dai ultins dîs. (V.V.) – 26.07.2022