Doi fradis di origjin campane a son stâts blocâts dai agjents de Scuadre mobil di Pordenon par possès di droghe e armis. La operazion e je stade fate martars intal dopomisdì, cuant che lis fuarcis dal ordin a àn ricevût une segnalazion par un scurtissament a Davian ae fin di une barufe.
L’agressôr, un om di 24 agns resident a Purcie, scjampât cuntune Opel Corsa, al è stât cjapât pôc dopo intant che al stave tornant a cjase. Cu la percuisizion de machine i agjents a àn cjatât il curtìs che forsit al è stât doprât e un piçul sachet di hashish. La percuisizion fate daspò dentri cjase e à fat discuvierzi ai agjents dôs pistolis no declaradis, 23 colps, 50 colps di salve, 48 bots no permetûts e 100 grams di hashish platâts intal frigorifar.
Il zovin al è stât fermât par possès di armis, droghis e par lesions ingriviadis. In manetis ancje il fradi di 21 agns, che dentri cjase a son stâts scuvierts 720 grams di hashish e une pistole. Ducj i doi a son stâts puartâts in preson, ma dopo il judiç pes indagjins preliminârs al à decidût pai arescj domiciliârs cul braçalet eletronic. (a.d.g.) – 05.07.2024
