Doi incidents stradâi intal dopomisdì dilunc de A4, a pocje distance l’un di chel altri, intal trat cjapât dentri tra Vilès e Palme, in direzion di Vignesie.
Diviersis lis clamadis rivadis al Numar unic di emergjence Nue112 par segnalâ la emergjence. Sul puest a son stadis inviadis dôs ambulancis, une machine di emergjence mediche e l’elisocors.
Il prin incident stradâl al à cjapât un furgon e un camion. Intal impat un om al è restât incjastrât dentri dal furgon. Lis Vuardiis dal fûc a àn lavorât plui di 30 minûts par diliberâlu dal abitacul. Il vuidadôr, ferît, al è stât traspuartât in svol al ospedâl Sante Marie de Misericordie di Udin in cundizions seriis.
Il secont incident stradâl al è sucedût a pocje distance dal prin, simpri in direzion Vignesie. In chest câs a son stadis dôs i autos e cuatri lis personis coinvoltis. Dutis a son stadis controladis sul puest dal personâl medic infermieristic e a àn refudât il traspuart in ospedâl. (A.D.G.) – 16.05.2023
