Doi sborsarûi peruvians, om e femine, cence cjase, a son stâts arestâts de Polizie cu la acuse di robarie ingriviade. Ai 2 di Dicembar i doi delincuents a vevin puartât vie il tacuin a une siore intimpade a Belum, par dopo lâ daurman a tirâ fûr 1.000 euros cul bancomat de vitime, fat che al veve judât i agjents a scuvierzi la muse dai doi e la targhe de auto doprade.
Tal dopomisdì dal di’ dopo, la stesse auto e je stade viodude intant che e jentrave a Pordenon e i poliziots a àn tacât a lâ daûr de machine. I doi peruvians si son fermâts dentri di un supermarcjât indulà che di li a pôc une siore e à patît une robarie, par dopo movisi intune altre buteghe, simpri un supermarcjât, indulà che soredut la femine e jere stade viodude movisi cun fâ suspiet dongje di ciertis clientis.
A pene jessûts fûr, i doi laris si son cjatâts denant i agjents che ju àn blocâts e percuisîts: intor de femine al è stât cjatât un tacuin a pene puartât vie a une siore. Daspò, de percuisizion de auto a son saltâts fûr 13.700 euros e 7 cjartis di credit. I doi laris a son stâts daurman arestâts e puartâts in preson. (a.d.g.) – 12.12.2024
