Omicidi di Codroip: la acuse e domande 24 agns di reclusion par Paolo Castellani. Al à concludût cussì vuê a buinore il Pm Claudia Finocchiaro devant de Cort di Assise di Udin intal procès pal omicidi di Elisabetta Molaro, copade dal om cun 71 curtissadis. Une recuisitorie durade pôc plui di mieze ore indulà che il procuradôr sostitût al à ricuardât cetant che al è sucedût ai 15 di Jugn dal an passât: lui che al cîr di cjapâ a bracecuel la femine, il dinei di jê, la agression cul curtìs cjapât sù in cusine pôc prime. Dopo lis telefonadis al 118 e ae madone, la fuide bande il torint Cuar, la prove di suicidi e infin l’arest.
Il Pm al à escludût la premeditazion, batint su lis agravantis dal rapuart matrimoniâl e de crudeltât, ma ancje su la concession des atenuantis gjenerichis pe disposizion tignude dilunc des investigazions e il procès. (A.D.G.) – 03.03.2023
