Dopli incident, cjapade ancje l’auto dai carabinîrs che a fasevin i rilevaments

Doi carabinîrs de stazion di Manià a son restâts cjapâts dentri cheste matine intun incident stradâl. Clamâts a rilevâ un bot a Montreâl, dilunc de Sp19 di S. Lenart, ae altece de Tamoil, là che e jere restade cjapade une auto lade fûr di strade, la lôr machine di servizi e je stade centrade di une veture.

In principi al jere stât ativât ancje l’elisocors, che però nol è jevât par vie dal brut timp.

Il personâl sanitari, rivât sul puest cun ambulance e machine di emergjence mediche, al à traspuartât i ferîts – il conducent di une machine e un carabinîr – li dal ospedâl di Pordenon. Il militâr al à ripuartât contusions dome lizeris. Rilêfs de polizie stradâl di Spilimberc. (a.d.g.) – 25.10.23