La Polizie locâl de Comunitât de mont de Cjargne e à fat une schirie di controi tai comuns di Damâr e Tumieç, soredut inte zone de autostazion, judâts di une patulie de Polizie locâl dal “Venit Est” compagnade dal cjan Konan, vie pe zornade dai 16 di Avost.
Dilunc dai controi, i agjents a àn cjatât e denunziât ae autoritât judiziarie un fantat cjargnel di 22 agns, che al vîf a Vile di Cjargne, cun intor un curtìs di origjin indonesiane che nol pues jessi puartât ator.
Altris trê sogjets – un fantat di 23 agns sloven, un di 29 agns irachen e un di 25 agns talian che al vîf dongje Tumieç – a son stâts segnalâts ae Prefeture di Udin pe detenzion di droghe hashish pal consum personâl.
Cjatât a Tumieç ancje un tunisin cence cjase e cun precedents penâi, segnalât ae Procure de Republiche e ae Cuesture di Udin par fâ il decret di espulsion. (a.d.g.) – 21.08.2024
