A Lignan nol è stât stupri di grup: a discolpâ i indagâts a son stâts i filmâts dai rapuarts sessuâi vûts cu la fantate di 18 agns furlane. Il Gip di Udin Emanuele Lazzaro al à acetât la domande dal Pm Andrea Gondolo e al à archiviât lis posizions dai cuatri zovins pes accuses di violence sessuâl.
I fats a rimontin al Avost 2021, cuant che la zovine e à denunziât di jessi stade violentade di 5 fantats, che un di chei minôr, intun apartament de localitât balneâr furlane. La sô conte però nol je stade confermade des provis. Dai controi sanitaris su la fantate, di fat, no son vignûts fûr segns di abûs e intai 12 videos zirâts da zovins dilunc dai rapuarts no si pues viodi nissune violence o costrizion de bande dai indagâts.
I filmâts a son costâts però a un di lôr, un om di 22 agns di Busto Arsizio, la imputazion par difusion ilecite di video esplicits. Il zovin, di fat, al à inviât midiant messazistiche eletroniche a un dai indagâts un video zirât cence la autorizazion de fantate.
“O cjapìn at de archiviazion – al comente il legâl de fantate, l’avocat Paulo Viezzi -, ma o stin valutant il reclam. Intal fassicul dal judiç no jere la relazion de psicolighe, incjariade de Procure di esaminâ la zovine. La psicolighe e jere rivade a conclusions in contrast cun chês di Pm e Gip. Cun di plui, la domande di archiviazion fate de Procure dal Tribunâl dai minôrs di Triest pal minôr coinvolt inte vicende e je stade mandade indaûr – al conclût – e al è stât disponût un suplement di investigazion”. (H.L. – A.D.G.) – 13.01.2023
