E cjape forme la rotatorie fûr dal casel autostradâl a Palme

Di cheste matine si pues movisi su la rotatorie in vie di costruzion ae crosere tra lis stradis regjonâls 352 e 126 e il casel di Palme de autostrade A4. Si è concludude duncje – secont il program – la prime fase dai lavôrs di une opare tant spietade des aministrazions locâls. La aree e restarà ancjemò un cantîr, par chest auto e mieçs pesants a viazaran in modalitât provisorie cuntune strade plui strente par consintî intai dîs che a vegnin la conclusion dai intervents. Di fat, inte seconde fase che e varès di concludisi – timp permetint – dentri de fin di Otubar, a restin di completâ il gnûf implant di iluminazion, lis segnaletichis verticâls e orizontâls e la gnove pavimentazion. Eventuâls sieradis al trafic a podaressin verificâsi nome vie pe gnot (cuant che il trafic al cale) propit par permeti ae dite apaltadore di fâ la asfaltadure. (a.d.g.) – 18.09.23