I Conseis comunâi di Spilimberc e di Dignan, che si son cjatâts tal municipi de citât dal mosaic, a àn aprovât ae unanimitât un ordin dal dì par dî un clâr “No” ae roste cun sclusets mobii di fâ sù tra Dignan e Spilimberc, che e varès di costâ 200 milions di euros e che, adun cun altris lavôrs (come chei sul cjanâl Cavrato, di rinfuarciment dai arzins tra Cisarûl e la fôs, che cence di chei la sigurece no sarès garantide) e varès di meti al sigûr il teritori de part basse dal flum tal câs di une plene dal Tiliment cuntune puartade di aghe plui alte di 4 mil metris cubis par secont.
I sindics Enrico Sarcinelli e Gianbattista Turridano a àn dit in mût clâr che a son cuintri di chest lavôr e che, ancje se a capissin lis preocupazions di Tisane, a domandin daurman un incuintri ae Zonte regjonâl.
Dilunc dal Consei comunâl, i comitâts cuintri de roste a àn manifestat di fûr par palesâ di jessi dal dut cuintri di cheste opare e par domandâ un incuintri al assessôr regjonâl dal Ambient Fabio Scoccimarro. (a.d.g.) – 18.07.2024
