No le à fate la femine che si jere inmalade par cause dal virus West Nile. La siore, che e veve 80 agns e e viveve a Vilote di Cjons, e je muarte îr sore sere intal repart di neurologjie dal ospedâl di Pordenon, indulà che e jere ricoverade in cundizions griviis.
Îr i tecnics dal dipartiment di prevenzion de Aziende sanitarie dal Friûl Ocidentâl a àn fat un sorelûc inte zone indulà che e viveve cul om, cence cjatâ situazions in potence critichis, ma dut câs a àn invidât il sindic Laura Doro a fâ daurman un tratament par copâ lis larvis – tacât vuê di matine tor des 8.30 – intes areis dongje de cjase indulà che e viveve la femine e fintremai a 200 metris di distance.
I prins segnâi de infezion a jerin saltâts fûr ai 10 di Lui cuant che la siore e veve scomençât a patî strache e mancjance di fam. Daspò la situazion e je lade simpri piês cuant che e je rivade fiere alte e encefalite fin ai 14 di Lui, cuant che e je jentrade in come ireversibil. (a.d.g.) – 19.07.2024
