I diluvis fuarts che si son scjamâts îr sul Friûl cun passe 150 milimetris di ploie e cun pontis di passe 200, a àn metût sot pression pompîrs e volontaris de Protezion civîl. Cent e trente i intervents dome pai Vigjii dal fûc, stes numar pe Protezion civîl.
Dome il personâl dai pompîrs dal Comant di Pordenon al à fat un centenâr di intervents in 15 oris, cul dopleament dai turnis di lavôr.
Lis ploiis vie pe gnot a àn puartât gnûfs inagaments di Sacîl a Tisane, ancje parcè che i canâi no rivavin plui a puartâ vie la tante aghe vignude ju’ dilunc de zornade.
I volontaris de Protezion civîl a àn puartât indulà che al ocoreve sacuts di savalon, soredut a Siest, indulà che la aghe e menaçave la Abazie.
Cumò si trate di fâ la conte dai dams, dopo doi dîs di ploie fuarte. A restin sierâts i vâts di Rossêt intal comun di Vivâr e di Murlis intal comun di Çopule, di là dai vâts secondaris di Cordenons. E reste sierade ancje la strade dal Tul intal comun di Clausêt par dute la durade de alerte meteo, sprolungjade pal Friûl Ocidentâl fin al misdì di doman. (a.d.g.) – 17.05.2024
